Pamje të rënda/ Momenti kur makina përplas efektivin e policisë në Peshkopi

Euronews Albania ka siguruar pamjet e aksidentit, ku një shofer i dehur përplasi me makinën e tij një punonjës të policisë në Peshkopi.

Në pamjet e siguruara, shihet punonjësi i policisë, i cili po ecte në trotuar, me shpinë nga makina, ndërkohë që mjeti, i cili po vinte me shpejtësi, doli nga rruga dhe e përplasi efektivin.

Efektivi, i identifikuar me inicialet V.Gj., është transportuar me helikopter në spitalin e Traumës në Tiranë ndërkohë shoferi i automjetit i cili dyshohet se ishte nën efektin e alkoolit është shoqëruar në Komisariat.

Policia njofton se ka arrestuar shtetasin A.Sh. (M), 27 vjeç, banues në Dibër, për veprat penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”.

Nga aksidenti ka mbetur i lënduar edhe një 20-vjeçar, i cili po merr trajtim mjekësor në Spitalin e Peshkopisë dhe ndodhet jashtë rrezikut për jetën.

Sipas policisë, ngjarja ka ndodhur të hënën rreth orës 18:30, në kryqëzimin e Velias, në Peshkopi.

Shoferi 27-vjeçar ka qenë duke drejtuar një automjet tip “Golf” dhe dyshohet se ka humbur kontrollin mbi drejtimin e mjetit, duke dalë nga rruga ku ka përplasur një person dhe më pas ka përfunduar në hyrjen e një dyqani.

Grupi hetimor është duke punuar për zbardhjen e rrethanave të aksidentit.

LEXONI GJITHASHTU:

• Makina del nga rruga dhe përplas policin në Peshkopi, arrestohet shoferi i dehur
• Rama në Peshkopi: Përfunduam ‘Rrugën e Arbrit’, Dibra një lagje e Tiranës tani