Java e Sigurisë Rrugore, OBSH: 1.2 milion njerëz humbasin jetën në aksidente

Çdo vit, në botë humbin jetën mbi 1.2 milionë njerëz në aksidente rrugore, ndërsa 50 milionë të tjerë plagosen. Viktimat më të shumta janë të rinj, mes moshës 5 deri në 29 vjeç. Gati gjysma e tyre janë këmbësorë dhe çiklistë.

Në Javën Globale të Sigurisë Rrugore, Organizata Botërore e Shëndetësisë bën thirrje për masa urgjente për ta bërë ecjen dhe çiklizmin më të sigurtë.

Ekspertët vëne në dukje se ecja dhe çiklizmi jo vetëm që parandalojnë aksidentet dhe përmirësojnë shëndetin, por ndihmojnë edhe në uljen e emetimeve të karbonit, ndotjes së ajrit dhe zhurmës, duke krijuar qytete më të pastra dhe më të jetueshme.

Raporti nxjerr në pah se në shumë qytete, megjithëse 35–45% e udhëtimeve janë brenda 2–5 km, ato vazhdojnë të kryhen me makina, duke rënduar ndjeshëm mjedisin, ndërsa vetëm 0.2% e rrugëve në botë kanë korsi biçikletash.

OBSH kërkon që vendimmarrësit të investojnë në trotuare, korsitë e biçikletave dhe kufizimin e shpejtësisë, për të shkurtuar viktimat dhe për të ndërtuar qytete më të sigurta për të gjithë.

LEXONI GJITHASHTU:

• Turistët “pushtojnë” Durrësin që në pranverë, sezoni zgjatet me dy muaj
• Ngjarje e rëndë në Gramsh, shembet masivi i dheut, humb jetën punëtori