PD ankimon në KAS vendimin e Celibashit për nisjen e numërimit të votave nga Greqia

Partia Demokratike ka depozituar në Komisionin e Ankesave dhe Sanksioneve (KAS) një ankim ndaj vendimit të Komisionerit Shtetëror të Zgjedhjeve, Ilirjan Celibashi, i cili urdhëroi nisjen dhe përfundimin e numërimit të çdo dokumentacioni zgjedhor të mbërritur nga jashtë vendit, përfshirë edhe zarfet e ardhura nga Greqia.

Demokratët kundërshtojnë pikërisht votat që kanë mbërritur nga shteti fqinj, duke pretenduar për manipulim zgjedhor në këtë proces.

“Pezullimin e efekteve të Vendimit të KSHZ, z. Ilirjan Celibashi, gjersa ankimimi ynë të shqyrtohet”, thuhet në ankimimin e Partisë Demokratike.

Sipas të dhënave, nga Greqia kanë mbërritur rreth 53 mijë zarfe nga 68 mijë të dërguara. Ende mbetet për t’u parë nëse numërimi i tyre do të sjellë ndryshime në rezultatin e subjekteve politike apo të kandidatëve në listat preferenciale.

Vlen të theksohet se ankimimi i PD-së nuk pezullon procesin e numërimit. Numërimi vijon normalisht deri në një vendim përfundimtar nga KAS.

LEXONI GJITHASHTU:

• Vota e diasporës nga Greqia/ Celibashi: Të hapet dhe të vijojë numërimi
• Topalli nga protesta e opozitës: Procesi zgjedhor i 11 majit ishte i cenuar