Vodhi 3 apartamente, celularë dhe para në Himarë, arrestohet 46 vjeçari

Policia e Himarës ka zhvilluar një operacion për goditjen e veprimtarive kriminale në fushën e vjedhjes së pronës, ku si rezultat u bë e mundur arrestimi i shtetasit me iniciale S. G., 46 vjeç, banues në Tiranë.

46 vjeçari u kap në orët e para të mëngjesit të datës 25.05.2025, pasi kishte vjedhur tre aparate celularë dhe një shumë parash, në ambientet e një kompleksi me apartamente pushimi, në Himarë.

Gjatë kontrollit të ushtruar në ambientin ku qëndronte ky shtetas, Policia gjeti dhe sekuestroi 10 granata dore luftarake, 6 aparate celularë dhe veshje e doreza të dyshuara të përdorura gjatë vjedhjeve.

Nga veprimet hetimore rezultoi se i arrestuari është autor edhe i dy vjedhjeve të tjera, të ndodhura më datë 07.05.2025 dhe 11.05.2025, përkatësisht në të njëjtin kompleks apartamentesh pushimi dhe në një banesë në lagjen “Livadh”, ku janë vjedhur aparate celularë dhe shuma parash prej 98000 lekë dhe 90000 lekë.

Në vijim të veprimeve, u arrestua për veprën penale “Moskallëzim i krimit”, edhe shtetasja me iniciale D. Rr., 27 vjeçe, banuese në Vlorë, e cila qëndronte në një ambient me autorin e vjedhjeve, dhe dyshohet se ishte në dijeni të veprimtarisë kriminale dhe nuk e kallëzoi atë.

Vijon puna hetimore për dokumentimin e rasteve të tjera, ku ky shtetas dyshohet si autor.

LEXONI GJITHASHTU:

• Organizonin lojëra fati në lokal, arrestohen 2 punonjësit, në kërkim pronari
• Në arrest shtëpie për dhunë, 49-vjeçari godet gruan e largohet. Përfundon në pranga