I kërkuar për trafik droge në Itali, arrestohet në Kroaci 23-vjeçari shqiptar

Një 23-vjeçar shqiptar, i shpallur në kërkim ndërkombëtar nga autoritetet italiane, është arrestuar në Zagreb të Kroacisë.

Shtetasi Arjan Toçi, banues në Peshkopi, ishte në kërkim në bazë të një urdhër-arresti të lëshuar nga Gjykata e Hetimeve Paraprake në L’Aquila, Itali, për veprën penale “Trafikimi i lëndëve narkotike”, kryer në kuadër të një organizate kriminale.

Operacioni u realizua falë bashkëpunimit të strukturave të FAST Albania me homologët e FAST Kroacisë dhe FAST Italisë, nëpërmjet rrjetit europian ENFAST.

“Në kuadër të bashkëpunimit të ngushtë me rrjetin ENFAST dhe homologët e FAST Kroacisë dhe FAST Italisë, është bërë i mundur lokalizimi dhe arrestimi, në territorin e Kroacisë, i shtetasit shqiptar A. T., 23 vjeç, banues në Peshkopi, i shpallur në kërkim ndërkombëtar”, thuhet në njoftimin e policisë.

Autoritetet shqiptare theksojnë se mbeten të angazhuara maksimalisht për kapjen dhe ekstradimin e shtetasve të kërkuar, me qëllim vënien e tyre përpara drejtësisë.