Shkodër/ Asgjësohen 2943 bimë narkotike, procedohen penalisht 2 roje mjedisi

Operacioni policor i koduar “Koordinata” ka vazhduar me intensifikimin e kontrolleve në territorin e qarkut Shkodër, me fokus në goditjen e kultivimit të bimëve narkotike. Gjatë këtyre operacioneve, janë gjetur dhe asgjësuar gjithsej 2943 bimë të dyshuara narkotike të llojit kanabis.

Në njësitë administrative Pult dhe Shosh, shërbimet e Komisariatit të Policisë Shkodër kanë gjetur dhe asgjësuar 735 bimë narkotike. Ndërsa në njësitë administrative Kastrat dhe Gruemirë, shërbimet e Komisariatit të Policisë Malësi e Madhe kanë asgjësuar 1631 bimë të dyshuara. Po ashtu, në territorin e njësive administrative Temal dhe Shllak, Komisariati i Policisë Vau i Dejës ka sekuestruar 139 bimë narkotike, ndërsa në Luf-Qerret dhe Gjegjan, Komisariati i Policisë Pukë ka asgjësuar 438 bimë të tjera.

Për këtë operacion, janë proceduar penalisht dy roje mjedisi për shpërdorim detyre: V. P., roje pyjesh dhe A. K., roje e zonave të mbrojtura. Ata janë të dyshuar për bashkëpunim në kultivimin dhe mbrojtjen e bimëve narkotike në zonat përkatëse.

Operacioni “Koordinata” është pjesë e angazhimit të Policisë së Shtetit për të goditur krimin e organizuar dhe kultivimin e bimëve narkotike, duke intensifikuar kontrollet dhe hetimet në çdo cep të territorit të Shqipërisë.

LEXONI GJITHASHTU:

• Zjarr në fshatin Palokastër, flakët rrezikojnë banesat e zonës
• Në kërkim ndërkombëtar për krime të rënda, kapet 41-vjeçari nga Maqedonia e Veriut