Avokatët e Veliajt kërkojnë informacion nga ‘Burgjet’ mbi masat e përdorura

Avokatët e kryetarit të Bashkisë së Tiranës, Erion Veliaj, i janë drejtuar zyrtarisht Drejtorisë së Përgjithshme të Burgjeve me një kërkesë për informacion dhe dokumentacion në lidhje me procedurat e ndjekura gjatë shoqërimit të klientit të tyre në një vizitë mjekësore më 17 korrik 2025.

Veliaj ndodhet në paraburgim në IEVP Durrës që prej datës 12 shkurt 2025 dhe kishte kërkuar më herët trajtim shëndetësor, kërkesë e cila, sipas avokatëve, ishte refuzuar disa herë para se të miratohej më në fund.

Sipas tyre, vizita u shoqërua me një prani të jashtëzakonshme sigurie prej rreth 30 efektivësh të policisë dhe hetues të BKH-së, disa prej të cilëve ishin të pranishëm edhe brenda sallës së ekzaminimit gjë që konsiderohet jo vetëm e pajustifikuar për një të paraburgosur si zoti Veliaj, por edhe një shkelje e rëndë e protokolleve mjekësore dhe standardeve për trajtim njerëzor.

Në kërkesën zyrtare, avokatët kërkojnë transparencë të plotë mbi:

Procedurat e ndjekura gjatë shoqërimit

Forcat e angazhuara në operacion

Kohëzgjatjen e qëndrimit në institucionin shëndetësor

Dokumentacionin mbi planin e masave të marra

Zyra ligjore thekson se çdo cenim i dinjitetit dhe trajtimit njerëzor të klientit të tyre do të ndiqet me të gjitha mjetet ligjore të mundshme.