Kryeministri Edi Rama u bën thirrje banorëve: Sinjalizoni çdo vatër zjarri

Në një tjetër reagim të sotëm ndaj situatës së zjarreve në vend, kryeministri Edi Rama ka ndarë shqetësimin e përjetuar gjatë dy netëve për shkak të vështirësisë për shuarjen e flakëve.

Rama thekson se zjarret janë vënë nën kontroll nga forcat në terren, por po punohet ende për shuarjen totale të flakëve. Më tej, kryeministri ka bërë apel ndaj të gjithë banorëve që në momentin kur konstatojnë një vatër zjarri, të njoftojnë autoritetet përkatëse në kohë.

“Dy ditë e netë ekstremisht të vështira, ku forcat zjarrfikëse të bashkive, Emergjencat Civile, Forcat e Armatosura po përballen me zjarre të mëdha në Skënderbegas, Sojnik të Gramshit, Koshtan të Memaliajt, në Hormovë, Kodër e Lekël të Tepelenës, në kufi me Gjirokastrën, Dhivër, Kakodhiq në Finiq, si dhe në Dropull në kufi me Delvinën, ku rreziku dhe flakët kanë qenë të pamëshirshme

Falë guximit vetëmohues dhe angazhimit total të të gjitha forcave në terren, është arritur fatmirësisht që zjarret të vihen nën kontroll, ndërkohë që vazhdon puna papushim drejt shuarjes së tyre dhe gatishmëria maksimale për çdo riaktivizim të mundshëm apo vatra të reja

Thirrje të gjithë banorëve të tregohen të kujdesshëm, të sinjalizojnë çdo vatër zjarri para se të jetë vonë dhe të ndjekin këshillat e autoriteteve, ndërsa për kriminelët që luajnë me flakët, ndëshkimi do të jetë maksimal”, shkruan kryeministri Edi Rama.

LEXONI GJITHASHTU:

• Kryeministri Rama: Mirënjohje për zjarrfikësit, dënimin më të rëndë ndaj autorëve
• “Po mendoja për fëmijët…”, banorët flasin për zjarret në Gramsh, 200 të evakuuar