“Jagiellonia kundërshtar i vështirë për Dinamon”, Skarço: Berisha nuk është Zabërgja

I ftuar në Euronews Albania, gazetari sportiv Eno Skarço analizoi ecurinë e Dinamos në Europë dhe sfidat që e presin skuadrën në fazën Play Off të Conference League.

Pas fitores 3-1 ndaj Hajduk Splitit, skuadra shqiptare përballet tani me një tjetër sfidë të fortë, ekipin polak Jagiellonia, që sipas Skarços është shumë më i fortë në letër sesa kundërshtari i mëparshëm.

“Jagiellonia ishte në çerekfinalen e Conference League vitin e kaluar dhe u eliminua nga Betis, finalist i asaj edicioni. Ka disa lojtarë që vlejnë 1 milion euro dhe ata i mbajnë, ne i shesim”, tha gazetari.

Skarço shfaqi skepticizëm për lojtarin më të ri të Dinamos, Bernard Berishën, duke theksuar se ai nuk do të sjellë të njëjtën freski dhe cilësi që kishte Baton Zabërgja.

“Do të doja shumë që Dinamo të mbante lojtarët si Zabërgja dhe Itodo. Megjithë respektin për Berishën, ai ka luajtur në nivel të lartë te Skënderbeu dhe ndoshta në atë kohë ishte si Zabërgja, por nuk janë të njëjtat cilësi. Dinamo u mbrojt duke marrë Berishën dhe Guindo për të limituar dëmet nga largimi i lojtarëve të tjerë, por nuk janë të njëjtë me ata që kanë ikur,” tha Skarço.

Gazetari shtoi se do të ishte ideale që Dinamo të ruante lojtarët me vlerë mbi 1 milion euro, pasi nëse skuadra do të arrijë të kualifikohet në fazën e grupeve të Conference League, fitimet mund të arrijnë deri në 2 milion euro.

“Pavarësisht këtyre levizjeve, ky sezon është padyshim madhështor për Dinamon,” përfundoi ai.

LEXONI GJITHASHTU:

• Dinamo prezanton sulmuesin Bernard Berisha, i gatshëm për Play-Off
• Tre gola, 120 minuta dhe histori! Dinamo përmbys Hajdukun e Splitit në “Air Albania”