Kërcënimi rus, Lituania përfundon instalimin e “dhëmbëve të dragoit”

Lituania ka finalizuar vendosjen e pengesave mbrojtëse të njohura si “dhëmbët e dragoit” në kufirin me enklavën ruse të Kaliningradit, njoftoi Ministria e Mbrojtjes. Ky veprim përbën fazën e fundit të një sërë masash të reja të sigurisë, të ndërmarra për të penguar çdo kërcënim të mundshëm nga Rusia.

“Po fillojmë nga niveli taktik, me pengesa specifike në kufi, dhe më vonë do ta kombinojmë gjithë planin inxhinierik në një sistem të plotë konceptual,” deklaroi komandanti i ushtrisë lituaneze.

Në një reagim të shpërndarë në platformën X, Ministria e Mbrojtjes e Lituanisë theksoi se ky është një “hap paraprak që synon të sigurojë mbrojtje më efektive”.

Tre shtetet baltike, Lituania, Letonia dhe Estonia, janë anëtare të NATO-s dhe kufizohen me Rusinë. Përveç kësaj, Lituania dhe Letonia ndajnë kufi edhe me Bjellorusinë, aleaten kryesore të Moskës.