Izraeli eliminon kreun e grupit terrorist që mbante peng një familje

Ushtria izraelite (IDF), në bashkëpunim me Agjencinë e Sigurisë së Brendshme (Shin Bet), konfirmoi të mërkurën vrasjen e Musbah Salim Musbah Dayyah, kreut të grupit terrorist Muxhahedin, përgjegjës për rrëmbimin dhe mbajtjen peng të familjes Bibas.

Sipas IDF, Dayyah u vra në një sulm të përbashkët në zonën Nuseirat në Rripin e Gazës, ku ai vepronte aktivisht si një nga drejtuesit kryesorë të organizatës. Ai konsiderohej si një figurë kyçe në orkestrimin e sulmeve terroriste, jo vetëm në Gaza, por edhe në Bregun Perëndimor.

Dayyah është udhëheqësi i katërt i këtij grupi që është eliminuar nga forcat izraelite, dhe i treti që është vrarë në muajt e fundit, si pjesë e operacioneve të vazhdueshme kundër elementëve ekstremistë.

Sipas deklaratës zyrtare të IDF, grupi Kataib al-Muxhahidin (Brigadat e Luftëtarëve të Shenjtë), krahu i armatosur i Lëvizjes Muxhahedine Palestineze, luajti një rol të rëndësishëm në masakrën e 7 tetorit, duke përfshirë rrëmbime, vrasje dhe sulme të drejtpërdrejta ndaj civilëve izraelitë.

Operacioni i fundit për eliminimin e Dayyah konsiderohet si një hap i rëndësishëm në përpjekjet e Izraelit për të çmontuar rrjetin terrorist të përfshirë në sulmet e 7 tetorit dhe për të garantuar sigurinë kombëtare në rajon.

LEXONI GJITHASHTU:

• Parada në Pekin/ Putin: Takim i shkëlqyer, në nivel të lartë
• Xi, Putin dhe Kim shfaqin unitet në paradën ushtarake të Kinës