Vranë 2 vëllezërit në Roskovec, Prokuroria e Fierit dërgon në gjyq 7 persona

Prokuroria pranë Gjykatës së Shkallës së Parë të Juridiksionit të Përgjithshëm Fier, përfundoi hetimet dhe dërgoi në gjyq shtetasit Altin Kuka, Erivs Kuka dhe Emaurisio Kuka për veprën penale ‘Vrasja në rrethana të tjera cilësuese’ si dhe katër persona të tjerë për përkrahje të autorit të krimit e moskallëzim të krimit.

Në përfundim të hetimeve u provua se të pandehurit Altin Kuka, Erivs Kuka dhe Emaurisio Kuka në bashkëpunim me njeri-tjetrin, kanë kryer vrasjen e shtetasve e Lavdimir dhe Gramoz Kurtajt në fshatin Kurjan në Roskovec.

“Pak para se të ndodhte ngjarja, i pandehuri Er.K. ka pasur një konflikt fizik me djemtë e viktimës G.K., si dhe ka qëlluar me pistoletë kundrejt tyre dhe viktimës G.K. Pas komunikimit telefonik dy të pandehurit Em.K. dhe Er.K. janë takuar dhe ky i fundit i ka treguar ngjarjen.

Armën e zjarrit, automatik luftarak i modelit 56, me të cilën i pandehuri A.K. ka qëlluar viktimat G.K. dhe L.K., i pandehuri Er.K. i ka lënë në kasollen përbri pularisë me qëllim për t’i marrë në vijim i pandehuri Em.K. Ky i fundit, pasi ka marrë armën e zjarrit, automatik luftarak, ka shkuar në vendin ku ndodheshin viktimat, ka frenuar menjëherë para lokalit të tyre, ka marrë armën dhe ka mbushur karikatorin e saj, duke nxitur të pandehurin A.K. të qëllojë me breshëri drejt tyre. I pandehuri A.K. ka shtënë ndaj viktimave G.K. dhe L.K. me armën e zjarrit automatik luftarak, të cilën ia mori nga dora të pandehurit Em.K.

Gjithashtu, për të njëjtën ngjarje, Prokuroria ka marrë të pandehur dhe ka kërkuar dërgimin e çështjes në gjyq të të pandehurve: T.Z., akuzuar për kryerjen e veprës penale “Përkrahja e autorit të krimit”. Y.K. akuzohet për kryerjen e veprave penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe mbajtja pa leje e armëve të gjuetisë dhe sportive”; R.H. akuzuar për kryerjen e veprës penale “Moskallëzimi i krimit”; dhe E.H. akuzuar për kryerjen e veprës penale “Moskallëzimi i krimit”, bëri me dije Prokuroria.