“Synojmë zhvillim afatgjatë”, Kasami: VLEN po funksion në mënyrë perfekte

Kryetari i Komunës së Tetovës, Bilall Kasami, në lidhje live për Euronews Albania, foli rreth zgjedhjeve lokale dhe fushatës aktuale në Maqedoninë e Veriut.

Duke folur për fazën e re të fushatës, Kasami deklaroi se fokusi i tij tani është zhvillimi afatgjatë i qytetit, përfshirë ndërtimin e objekteve arsimore, qendrave sportive dhe kulturore, si dhe transformimin e Tetovës në një qytet modern dhe evropian.

Sa i përket kundërshtarëve politikë, Kasami tha se: “Ata kanë qenë në pushtet për 11 vite, dhe gjendja aktuale është pasojë e atyre 20 viteve të qeverisjes së tyre”.

Lidhur me zhvillimet brenda koalicionit shqiptar VLEN, Kasami mohoi se ka ndonjë përçarje serioze, pavarësisht përpjekjeve politike për ta dëmtuar unitetin e kësaj strukture.

“Situata është shumë e mirë, përkundër dëshirës së Ali Ahmetit për të krijuar përçarje, por ajo përçarje është reflektuar te vetë ai”, – tha Kasami.