Berisha: Rusmali pas dekretit antikushtetues të Begajt, e kam shkarkuar si ministër

Kreu i PD-së, Sali Berisha, në konferencën për mediat nga selia blu sulmoi presidentin Bajram Begaj për dekretin që çon në zgjedhje të parakohshme edhe bashkinë e Tiranës, kundër vendimit të Gjykatës Kushtetuese.

Berisha u shpreh se Begaj fshihet pas juristit të tij dhe ish-ministrit të PD, Ilir Rusmali për të justifikuar shkeljen që i ka bërë kushtetutës me dekretin për Tiranën.

Kryedemokrati sqaroi edhe të vërtetën sipas tij, në raportin me ish-ministrin e tij të Drejtësisë të cilin siç tha e kishte shkarkuar nga detyra.

“Ilir Rusmali është shkarkuar nga Berisha për korrupsion. Cila ka qenë ngjarja? Drejtori i përgjithshëm  i burgjeve Dashamir Maçi kishte hapur një tender, i vëllai i ministrit i shkon drejtorit dhe i kërkon tenderin, nuk ishin standardet e Ramës, ishin standardet e Berishës. Ai i tha, ik dhe mos u duk, je vëllai i ministrit. Vëllai i ministrit e kërcënoi. Maçi mençurisht e regjistron kërcënimin dhe ma solli në zyrë. Rusmali në vend që të kritikonte vëllain dhe të mbante qëndrim, çfarë bëri, në kundërshtim më kushtetutën shkarkon drejtorin e burgjeve kur nuk ishte përgjegjësi e tij por e këshillit të ministrave. Ministri mbajti anën e vëllait dhe shkarkoi drejtorin dhe unë shkarkova ministrin. I thashë me këtë që ke bërë duhet të largohesh. Sot është këshilltar i presidentit të cilin ligji nuk e lejon të kryejë asnjë detyrë tjetër, dhe merr edhe detyrën si kryetar i KAS, në kundërshtim me ligjin”, tha Berisha.

LEXONI GJITHASHTU:

• Kush do jetë emri i PD për Tiranën, Berisha: Kemi 13 kandidatë, do jetë më i dashuri
• Berisha komenton Çepanin, Hasimjan dhe Hackajn: Kandidatin mund ta kemi brenda javës