Debat në Kuvend/ Shehaj: Po vrisni partitë e reja, Balla: Po gënjen je në Komision

Kuvendi i Shqipërisë është përfshirë sot nga debate të ashpra mes deputetëve Taulant Balla, Agron Shehaj dhe Redi Muçi, pas votimit për ngritjen e Komisioneve të Posacme të Reformës Zgjedhore dhe Reformës Territoriale.

Debati u fokusua mbi akuza për mos përfshirje të partive të vogla në komisione. Agron Shehaj nga Mundësia akuzoi palët politike se nuk kanë përfshirë partitë e vogla:

“Unë nuk e kuptoj zoti kryetar sesi mazhoranca dhe opozita bëhen bashkë dhe ngrejnë një komision pa përfshirë partitë e reja. Edhe keni një qëllim që pasi keni vjedhur së bashku të vazhdoni të vidhni së bashku. Ky do të jetë rezultati i kësaj që të hiqni partitë e reja.”

Nga ana tjetër, Taulant Balla i kundërshtoi Shehajn, duke e akuzuar se nuk e ka kuptuar procesin:

“Ti bën shkollën e natës, nuk e ke lexuar dokumentin. Kemi marrë parasysh traditën parlamentare, është e pamundur që në një Komisionin e Posacëm të përfshihen të gjitha partitë politike. Ti nuk di të lexosh. Gënjeve kur the nuk je, se të kemi futur dhe ty dhe partitë me dy mandate.”

Debati u shtua edhe nga Redi Muçi i Lëvizjes Bashkë, i cili pyeti për arsyet e përjashtimit të partisë së tij:

“Ngritja e Komisionit u bazua në traditën parlamentare, dua të di se ku është tradita parlamentare që nuk është përfshirë një parti me përfaqësues në parlament. Edhe përfaqësuesi i mazhorancës tha me të drejtë që është miratuar me konsensus me 99 për qind. Ndërkohë këtu 1 për qind nuk u përfshi që është Lëvizja Bashkë. Ku bazoheni që përjashtoni një parti parlamentare nga e drejta e votës?”