Rama: Raporti i 2027 duhet të rekomandojë anëtarësimin e Shqipërisë

Kryeministri Edi Rama tha në konferencën e përbashkët për shtyp me ambasadorin e BE, Silvio Gonzato se progres raporti i KE për Shqipërinë e thotë qartë se vendi është në rrugën e duhur për të përmbyllur negiociatat deri në vitin 2027.

Rama theksoi se përmbyllja e negociatave deri në 2027 është objektivi dhe ambicia e qeverisë ndërsa nënvijëzoi se brenda vitit synohet të jenë mbyllur të gjithë grupkapitujt.

“Raporti thotë një gjë, që Shqipëria është në rrugën e duhur, për të përmbyllur teknikisht negociatat brenda vitit 2027. Duke thënë këtë, raporti i ka thënë të tëra. Ndërkohë që patjetër që në këtë rrugë të duhur, ka sfida dhe çështje për t’u adresuar jo vetëm në mënyrë sasiore por edhe cilësore në çdo hap. Natyrisht që raporti i progresit është një gotë e mbushur përgjysmë. Ajo që ne kemi bërë gjithmonë dhe do të bëjmë përsëri është që duke marrë energjinë e nevojshme nga gjysma plot, të fokusohemi me të gjithë energjinë e nevojshme te gjysma bosh që në 2027 ta përmbyllim këtë proces që raporti i vitit 2027 të shkruajë “rekomandojmë anëtarësimin e Shqipërisë”. Ky është objektivi historik dhe jam krenar që tanimë askush nuk harron të thotë se Shqipëria është pararojë në këtë proces me Malin e Zi dhe më në fund është shembulli pozitiv që iu jepet edhe të tjerëve që duan të bëhen pjesë e BE”, tha Rama.

LEXONI GJITHASHTU:

• Rama: Paga minimale 700 euro brenda këtij mandati
• Gonzato: Raporti i BE-së vlerëson përparimin në gjyqësor dhe angazhimin për integrim