Gjendet trupi i pajetë i një gruaje në lumin Shkumbin

Një ngjarje e rëndë është regjistruar mbrëmjen e sotme në Elbasan, ku në lumin Shkumbin është gjetur trupi i pajetë i një gruaje rreth 40 vjeçe.

Sipas informacioneve të para, ngjarja ka ndodhur rreth orës 19:00, në zonën e Krastës, ku banorët kanë njoftuar policinë pasi kanë vënë re trupin e një personi që lundronte në ujë.

Menjëherë në vendngjarje kanë mbërritur forcat e policisë, zjarrfikësit dhe palombarët, të cilët për shkak të errësirës janë përballur me vështirësi gjatë ndërhyrjes. Pas disa minutash kërkimesh, trupi i gruas është nxjerrë nga lumi me ndihmën e 7 efektivëve zjarrfikës dhe 10 efektivëve të policisë.

Viktima ende nuk është identifikuar, ndërsa dyshohet se vuante nga probleme të shëndetit mendor. Trupi është dërguar në morgun e spitalit të Elbasanit për veprime të mëtejshme mjeko-ligjore.

Deri më tani, asnjë familjar nuk është paraqitur për identifikimin e saj. Policia ka nisur hetimet për të zbardhur rrethanat e ngjarjes dhe për të përcaktuar nëse bëhet fjalë për vetëvrasje apo ndonjë shkak tjetër.

Njoftim zyrtar i policisë:

Rreth orës 17:30, në lumin Shkumbin, është gjetur e pajetë, dyshohet e mbytur në lumë, shtetasja D. B., rreth 55 vjeçe.

Kjo shtetase ishte e strehuar në një qendër sociale dhe vuante nga probleme të shëndetit mendor. Ajo ishte larguar nga qendra rreth orës 15:00 të ditës së sotme.

Grupi hetimor po punon për dokumentimin e plotë me prova ligjore të rrethanave të ngjarjes.

LEXONI GJITHASHTU:

• Shkaktoi aksidentin në gjendje të dehur, AMP arreston policin e Komisariatit 5
• Cilësia e botimeve në Panair, 10 tituj të rinj europianë do përkthehen në shqip