Franca stërvitje ushtarake me pagesë, Macron: Rreziku për luftë, i pranishëm

Presidenti francez Emmanuel Macron ka njoftuar të enjten rikthimin e shërbimit ushtarak në Francë, në një kohë kur frika për një përballje me Rusinë po rritet.

Kur kanë kaluar mbi 25 vjet nga heqja e rekrutimit, plani i ri parashikon që të rinj dhe të reja të dalin vullnetarë për një stërvitje ushtarake 10-mujore, kundrejt një pagese.

“Mënyra e vetme për t’iu shmangur rreziqeve është të përgatitemi për to. Ne duhet të mobilizohemi, të mobilizojmë kombin në mënyrë që të jetë në gjendje të mbrohet dhe të respektohet”, ka deklaruar Macron gjatë një takimi në një bazë ushtarake në jug të Francës.

Shërbimi i ri kombëtar do të nisë të aplikohet gradualisht duke filluar nga vera e ardhshme dhe do të ketë në fokus të rinjtë 18 ose 19-vjeçarë, që do të marrin të paktën 800 euro në muaj.

“Në këtë botë të pasigurt, ku forca triumfon ndaj së drejtës, rreziku për luftë është i pranishëm”, ka thënë Macron.

Ai ka theksuar se, forcat e armatosura do të përfitojnë nga të rinjtë dhe të rejat e motivuara dhe ka shtuar se, angazhimi i tyre është një akt besimi tek rinia franceze.

Fillimisht, kuota e kadetëve do të jetë e kufizuar në 3 mijë vitin e kaluar, por pritet të rritet në 50 mijë brenda vitit 2035.

Franca ka aktualisht një personel ushtarak prej 200 mijë trupash dhe 47 mijë rezervistë. Skema e re pritet ta çojë strukturën në 3 nivele, profesionistët, rezervistët dhe vullnetarët.

Ndryshimi e vë Francën në linjë me vende të tjera evropiane që kanë futur skema të reja të shërbimit ushtarak, me parametra të ndryshëm, për shkak të frikës nga një agresion i mundshëm rus.

LEXONI GJITHASHTU:

• Mediat: Ukraina ka pranuar marrëveshje për paqe me Rusinë, lufta drejt fundit
• Rektori nga Varshava: Lufta ka nisur, konsullatat u mbyllën në Rusi! Ja çfarë ndodh