Ligji i ri i konfliktit të interesit, Gjiknuri: Do të jetë vrastare në shumë sektorë

Deputeti i PS-së, Damian Gjiknuri gjatë fjalës së tij në Komisionin e Ligjeve ka folur në lidhje me Ligjin e ri të konfliktit të interesit të hartuar nga ILDKPI i cili është propozuar në Kuvend. Gjiknuri ka theksuar se ky ligj do të jetë vrastar për shumë sektorë.

Ai theksoi se ky ligj i ri do të ndalojë çdo punonjës publik të ushtrojë profesione në fusha të tjera teksa mori shembuj konkret të cilët nuk do të mund të ushtrojnë profesionet e tyre.

“Zyrtari do ndalohet të ushtrojë profesionin e tij në fusha të tjera. Kjo për mendimin tim në shumë sektorë të vendit do jetë vrastare. Si mund të vëmë ne kufizime që një pedagog të mos ushtrojë profesionin e mjekut, si të kufizojmë një pedagog që të mos ushtrojë detyrën e konsulentit, që të mos jetë në bordin e një ndërmarrje.

Kaq është Shqipëria, kaq pak njerëz ka me nivel intelektual. Sot po do të kesh zhvillim e progres, nëse nuk është i lidhur institucioni shtetëror me atë privat, ka mbaruar. Janë si dituria e makinave që mësonim ne në shkollë, kur nuk kishim makina”, tha Gjiknuri.

Deputeti shtoi se ky ligj duhet shqyrtuar pasi sipas tij kjo mund të sjellë probleme më vonë.

“Ka një kufizim aty që nuk u lejohen të ushtrojnë profesionin e licencuar. Një ekspert ekonomie si mund të mos jetë edhe pedagog edhe audit.

Është tjetër gjë kufizimi me vendimmarrjen e institucionit publik. Si mund ti them një avokati që të jesh pedagog duhet të lësh licencën e avokatit. Kjo është absurde”, tha ai.

LEXONI GJITHASHTU:

• Mijëra persona dolën në rrugë, çfarë i nxiti protestat në Bullgari?
• FOTOLAJM/ Mbërrin delegacioni i SHBA në Kremlin, Witkoff dhe Kushner takojnë Putin