Linda Rama: Teknologjia nuk është më thjesht një mjet, por një formë pushteti

Linda Rama mori pjesë ne sesionin “Spotlight” të zhvilluar në Qendrën e Lidershipit në Katar, aktivitet i mbajtur në Doha më 23 nëntor 2025.

Në fjalën e saj, Linda Rama u ndal në rolin e teknologjisë në shoqëri duke u shprehur se tashmë ajo nuk është më thjesht një mjet, por një formë pushteti që depërton në çdo dimension të jetës njerëzore.

“Kompanitë e mëdha të teknologjisë janë gjithmonë e më të pranishme në jetën tonë dhe, ndonjëherë, më shqetëson, sepse kanë monopolin mbi ne në një planet, që quhet iCloud, për të cilin nuk dimë asgjë”, thekson ajo.

Linda Rama vë në dukje se ky realitet e sfidon lidershipin në mënyrë thelbësore, pasi teknologjia krijon forma të reja ndërhyrjeje në privatësi, në punë dhe në vetë trupin e njeriut, duke e bërë kompleksitetin një gjendje të përhershme.

“Ata mund të hyjnë në shtëpitë tona, falë pajisjeve. Mund të hyjnë në vendet tona të punës, falë kompjuterëve. Mund të hyjnë brenda nesh, në trupat tanë, falë telefonave celularë”, shprehet ajo, duke nënvizuar se lidershipi duhet ta njohë dhe ta përballojë këtë realitet.

Rama rikthehet në vitin 1990, duke e përshkruar Shqipërinë si vendin e fundit në Evropën Lindore që doli nga komunizmi, për shkak të izolimit ekstrem.

Ajo kujton qartë se çfarë kërkonin shqiptarët në atë moment historik.

“Më kujtohen dy parulla, ‘liri, demokraci’ dhe ‘e duam Shqipërinë si gjithë Evropa’”, thotë ajo, duke theksuar se shoqëria ishte e qartë për atë që nuk donte, por jo për atë që e priste përpara.

Sipas saj, pas rënies së sistemit, u kuptua se mungesa e përgatitjes nuk ishte vetëm e qytetarëve, por edhe e lidershipit të ri, i cili nuk kishte përvojë praktike për një transformim kaq rrënjësor.

“Ata mund ta dinin teorikisht, por praktikisht askush nuk e dinte çfarë do të thoshte për një vend komunist të dilte nga një sistem e të hynte në një sistem krejt tjetër”, shprehet Rama, duke shtuar se tranzicioni u përjetua si një përplasje e fortë me realitetin e përditshëm.

Në Qendrën për Lidership të Katarit, Linda Rama u ndal po ashtu te përvoja personale e viteve të tranzicionit dhe te mënyra se si pasiguria dhe mungesa e përgjigjeve e shtynë drejt një rruge tjetër, larg Shqipërisë. Ajo tregon se në fillim kërkonte përgjigje brenda vendit, por pa sukses.

“Shkoja nga një mjedis në tjetrin, dëgjoja lajmet, dëgjoja kolegët e mi. Askush nuk më jepte dot përgjigje”, kujton ajo.

Vendimi për të studiuar jashtë vendit, sipas saj, i dha një kuptim më të thellë asaj që përfaqëson lidershipi në kohë transformimesh të mëdha, si atëherë, ashtu edhe sot.

“Sa herë ka kohë transformimesh të mëdha, udhëhiqesh nga ëndrrat, nuk udhëhiqesh nga dija”, thekson Linda Rama, duke shtuar se “lidershipi me ëndrra dhe pasion është shumë më i fortë sesa lidershipi me dije”.

Në fund, ajo e lidh këtë ide me motivimin personal dhe shoqëror, duke e parë pasionin për ndryshim si forcën kryesore shtytëse për përmirësim të vazhdueshëm.

LEXONI GJITHASHTU:

• Linda Rama në Londër: Po rizbulojmë vendin tonë në historinë globale
• A e ka menduar ndonjëherë t’i futet politikës? Përgjigjet Linda Rama