Plagosja me armë në Kukës, vetëdorëzohen në polici 2 vëllezërit e shpallur në kërkim

Dy vëllezërit e shpallur në kërkim lidhur me plagosjen e regjistruar të dielën në Kukës janë vetëdorëzuar në polici. Fatri e Ndriçim Iseberi plagosën Amarildo Cenën dhe Sadik Kapicën. Ndriçim Isaberi është proceduar penalisht.

Amarildo Cena nuk ishte i përfshirë në konflikt por u plagos nga pakujdesia pasi Ndriçim Isaberi goditi me qytën e pistoletës Kapicën.

“Policia e Kukësit ka vijuar veprimet hetimore dhe kontrollet për dokumentimin e rrethanave të ngjarjes së ndodhur ditën e djeshme dhe për kapjen e 2 autorëve të dyshuar të shpallur në kërkim. Si rezultat i kontrolleve të Policisë dhe nga pamundësia për t’u larguar, 2 vëllezërit e shpallur në kërkim për këtë ngjarje, janë vetëdorëzuar.

Në vijim të veprimeve procedurale, pas komunikimit me prokurorin e gatshëm, specialistët për Hetimin e Krimeve të Rënda arrestuan shtetasin N. I., 38 vjeç, dhe referuan materialet në Prokurori ku filloi procedimi në gjendje të lirë për vëllanë e tij, shtetasin F. I., 39 vjeç, banues në Kodër Lumë.

Këta dy shtetas janë konfliktuar fizikisht me shtetasin S. K., 65 vjeç, për motive të dobëta, dje, në vendin e quajtur “Dëshmorët”. Gjatë konfliktit, shtetasi N. I. e ka goditur me qytën e pistoletës shtetasin S. K., si dhe ka plagosur rëndë nga pakujdesia, shtetasin A. C., 36 vjeç, i cili nuk ishte i përfshirë në konflikt.

Në cilësinë e provës materiale u sekuestrua arma e zjarrit e dyshuar përdorur në ngjarje. Materialet procedurale shtesë iu referuan Prokurorisë pranë Gjykatës së Shkallës së Parë të Juridiksionit të Përgjithshëm Kukës”, njofton policia.

LEXONI GJITHASHTU:

• Durrës/ Dhunuan 48-vjeçarin, në pranga një nga autorët që donte të kalonte kufirin
• Osmani takon zëvendëssekretarin amerikan të Shtetit, Christopher Landau