Koçiu pret Komisionerin Brunner: Shqipëria e përkushtuar në rrugën e integrimit dhe sigurinë e përbashkët

Ministrja e Punëve të Brendshme, Albana Koçiu, priti këtë të premte Komisionerin Europian për Çështjet e Brendshme dhe Migracionin, Magnus Brunner në kuadër të një turi rajonal vizitash.

Gjatë takimit, ministrja theksoi se Shqipëria është e angazhuar që procesi teknik i integrimit me BE të përmbyllet në vitin 2027. Ajo e ka cilësuar këtë objektiv të arritshëm falë progresit të deritanishëm dhe bashkëpunimit të ngushtë me institucionet e BE-së.

Ajo më tej nënvizoi se arritja e këtij objektivi kërkon vijimin e reformave dhe zbatimin e plotë të standardeve europiane, veçanërisht në fushat e sigurisë, emigracionit dhe sundimit të ligjit.

Koçiu ndër të tjera vlerësoi mbështetjen e vazhdueshme të Komisionit Europian, veçanërisht në fushat e sigurisë, migracionit dhe procesit të integrimit, si dhe riafirmoi angazhimin e plotë të Shqipërisë për përmbushjen e detyrimeve në kuadër të Kapitullit 24.

Në lidhje me emigracionin dhe menaxhimin e kufijve, Koçiu informoi mbi zbatimin e Strategjisë së Migracionit 2024–2030, anëtarësimin e Shqipërisë si vëzhguese në Rrjetin Europian të Migracionit, ndryshimet në ligjin për të huajt, rritjen e kapaciteteve për mbrojtjen e të miturve të pashoqëruar, si dhe miratimin e Planit Kombëtar të Kontigjencës për Flukset e Përziera Migratore 2026-2028.