“Mjetet janë shkatërruar, po dëmtohemi edhe ne”, qytetarët denoncojnë gjendjen e aksit rrugor Elbasan–Cërrik

Aksi rrugor Elbasan–Cërrik, i rindërtuar vetëm gjashtë vite më parë, është kthyer në një shqetësim serioz për drejtuesit e automjeteve. Në pothuajse të gjithë gjatësinë prej 23 kilometrash, asfalti paraqitet i ngritur dhe i deformuar, duke shkaktuar dëmtime të mjeteve dhe duke u bërë burim aksidentesh.

“Më skandaloze se kjo rrugë e degraduar nuk ka. Njerëzit janë lodhur. Është inauguruar vetëm 6 vite më parë dhe sot është në këtë gjendje. Ka aksidente, sepse për t’iu shmangur gropave makinat përplasen me njëra-tjetrën. Unë kaloj çdo ditë këtu. Mjetet janë shkatërruar, por po dëmtohemi edhe ne”, thotë një zotëri.

“Katastrofë. Nuk mund të ecësh as normalisht. Gjithçka është jashtë çdo standardi. Punimet janë shumë të dobëta”, thotë një banor.

Investimi për këtë aks rrugor ka kushtuar rreth 8 milionë euro. Punimet nisën në vitin 2015 dhe përfunduan në vitin 2017. Gjendja aktuale e asfaltit ka ngritur pikëpyetje mbi cilësinë e zbatimit të projektit.

“Kjo është rruga më skandaloze që është bërë. Le të vijnë institucionet ta verifikojnë ku kanë shkuar paratë. Këto janë para publike. Duhet të bëhet nga e para”, thotë një qytetar.

Pa një ndërhyrje urgjente, deformimet e shumta në asfalt pritet të vazhdojnë të rrezikojnë sigurinë rrugore. Banorët kërkojnë përgjegjësi institucionale dhe rikonstruksion të plotë të aksit, duke theksuar se vetëm masa konkrete mund të parandalojnë aksidente dhe dëmtime të mëtejshme.