Shën Valentini mbush Tiranën me zemra, 14 Shkurti festohet në shesh dhe te Liqeni Artificial

Dekori festiv, ngjyra e kuqe, mesazhet e dashurisë dhe tullumbacet në formë zemre mbushën sot kryeqytetin në kuadër të Shën Valentinit, ose siç njihet ndryshe, dita e të dashuruarve.

Në qendër të qytetit, në Sheshi Skënderbej, instalacionet simbolike dhe dritat e dekorit u kthyen në vendin ideal për foton e ditës. Çiftet, familjet, turistët dhe qytetarë të të gjitha grupmoshave u përfshinë në këtë atmosferë festive, mes mesazheve të dashurisë dhe momenteve simbolike.

Mesazhi kryesor i qytetarëve ishte se respekti dhe besimi janë themeli i një marrëdhënieje të gjatë dhe të qëndrueshme.

Përveç Sheshit Skënderbej, edhe Liqeni Artificial i Tiranës ishte një prej atraksioneve ku shumë qytetarë zgjodhën të bëjnë foto dhe t’i dhurojnë lule njëri-tjetrit.

14 shkurti është dita që në kalendarin e krishterë i kushtohet Shën Valentini, martir dhe shenjtor. Sipas legjendës, ai ishte një prift romak i shekullit të tretë që martonte fshehurazi çiftet e reja, duke sfiduar një urdhër që ndalonte martesat e ushtarëve.

Për shkak të këtyre veprimeve, Valentini u arrestua dhe u ekzekutua më 14 shkurt, rreth vitit 269 pas Krishtit. Me kalimin e kohës, figura e tij u kthye në simbol të dashurisë dhe sakrificës për ndjenjat e sinqerta.