Rama: Rrëshqitjet në aksin Librazhd-Prrenjas janë çështje gjeologjike, jo korrupsion

Në mbledhjen e Grupit Parlamentar të Partisë Socialiste këtë të enjte, Kryeministri Edi Rama u ndal mbi situatën e aksit Librazhd–Prrenjasi, ku ka pasur rreshqitje dheu. Rama tha se është e gabuar që kjo ngjarje lidhet me korrupsionin, ndërkohë që është një çështje gjeologjike.

“Po flasin për rreshqitjen në rrugën e Librazhdit, por një rreshqitje shumë më dramatike është nga ana tjetër e kufirit, dhe tenxheret e Greqisë nuk kanë asnjë ngjashmëri me këtë fenomen këtu, ku edhe toka lëviz për shkak të korrupsionit. Ndërkohë, në atë aks po realizohet një nga veprat më të mëdha të infrastrukturës, e cila do të jetë një tjetër krenari e kësaj qeverie. Ju kujtohet rreshqitja e rrugës Korçë–Ersekë: brenda afatit, rruga u riparua totalisht me fondet e sipërmarrësit dhe sot rruga është e shqiptarëve. Ndodh dicka që nuk duhet të ndodhë, por këto nuk janë fenomene të pazakonta; ato ndodhin kudo. Ndryshimi është se në Portugali, Suedi, Itali apo Greqi këto janë çështje gjeologjike, ndërsa këtu përfshihet shpesh termi ‘korrupsion’. Në këtë lavazh mediatik, këto gjëra besohen: mendohet se makinat e ministrisë lahen me qumësht dallëndyshe, ndërkohë që dallëndyshet vriten me pushkë nga një tjetër ministër, ose mendohet se dikush shet jastëkë dhe dikush tjetër ka treqind shtëpi. Prandaj edhe vetë zorraxhinjtë e lavazheve, për shkak se kanë shpërlarë kaq gjatë dhe trurin e tyre duke përsëritur këtë refren, i besojnë korrupsionit në Shqipëri. Budallallëpsen kur bëhet numerimi i votave, mendojnë se do të fitojnë, por prapë u del Noc Rroku. Kjo zhurmë është dëmtuese për shoqërinë dhe për Shqipërinë”, tha Rama.