Mazhoranca miraton projektligjet, opozita braktis sallën pas debateve me Ballën

Seanca plenare e Kuvendit të Shqipërisë u mbyll pas përplasjesh mes deputetëve të mazhorancës dhe opozitës, që çuan në ndërprerjen disa herë të saj.

Deputeti Klevis Balliu dhe kreu i Grupit të PS-së, Taulant Balla, patën një përplasje pas së cilës ky i fundit kërkoi që të kalohej menjëherë në votim.

“Unë e mirëkuptoj që tensionet rriten, por ju pengoni punën tonë. Kërkoj të kalojmë në votim,” deklaroi Balla.

Në mbyllje, pasi opozita braktisi sallën, mazhoranca miratoi disa nga projektligjet në rendin e ditës, ndërsa disa të tjera nuk u miratuan.

Projektligjet e miratuara:

“Për një shtesë në ligjin nr. 69/2012, për sistemin arsimor parauniversitar” – 81 vota pro, 0 kundër, 0 abstenime

“Për ratifikimin e marrëveshjes së huas me KfW Frankfurt am Main për programin ‘Infrastruktura bashkiake V – faza II’” – 80 pro, 0 kundër, 0 abstenime

“Për Agjencinë e Mbikëqyrjes në Sistemin e Ekzekutimit të Vendimeve Penale” – 81 pro, 0 kundër, 0 abstenime

“Për disa ndryshime dhe shtesa në ligjin nr. 46/2018 për kontrollin e transferimeve ndërkombëtare të mallrave ushtarake dhe të artikujve me përdorim të dyfishtë” – 81 pro, 0 kundër, 0 abstenime

Projektvendimi “Për një shtesë në vendimin nr. 65/2025 për caktimin e anëtarëve zëvendësues në komisionet e përhershme” – 80 pro, 0 kundër, 0 abstenime

Projektligjet që nuk u miratuan:

“Për një ndryshim në ligjin nr. 9975, për taksat kombëtare” – 0 pro, 79 kundër

“Për një ndryshim në ligjin nr. 68/2017, për financat e vetëqeverisjes vendore” – 0 pro, 78 kundër