PD rikthen fjalimet, gazetari Ardit Hoxha zbardh detaje nga protesta e opozitës

Opozita do të zhvillojë sot protestën e radhës që pritet të nisë rreth orës 19:00 dhe do të zgjasë deri në orën 22:00.

Gazetari Ardit Hoxha raportoi se strukturat e PD janë angazhuar dhe kanë pasur porosi nga drejtuesi Berisha në të 12 qarqet që të ftohën qytetarët të marrin pjesë në protestën e sotme.

Ndryshe nga disa nga protestat e fundit, në këtë protestë do të rikthehen fjalimet në një podium të vendosur para Kryeministrisë ku pritet të flasë jo vetëm kryedemokrati Berisha por edhe folës të tjerë.

“Kjo protestë ka një veçanti në krahasim me protestat e mëparshme të cilat kishin një shpeshtësi më të madhe. Protesta e fundit ishte mbajtur më 22 mars, për protestën e sotme u desh rreth një muaj për t’u organizuar, kjo sepse strukturat e PD janë duke u marrë me procesin e zgjedhjeve në degë dhe kupolën e PD që duhet të mbyllet në muajin maj”, tha gazetari Hoxha.