Matura shtetërore, publikohen rezultatet e provimit të matematikës

Ministria e Arsimit, Rinisë dhe Sportit ka publikuar sot rezultatet e provimit të maturantëve për lëndën e matematikës.

Lajmi bëhet i ditur nga ministrja Evis Kushi, e cila pohon se janë marrë në shqyrtim shqetësimet e ngritura nga maturantët në lidhje me vështirësitë e testit.

Sipas saj, Komiteti i Maturës Shtetërore ka vendosur në formë unanime uljen e kufirit minimal të kalueshmërisë dhe atë të pikëve për çdo notë.

“Sipas angazhimit tonë, ne analizuam me shumë kujdes çdo shqetësim tuajin dhe të mësuesve mbi testin e matematikës në maturën shtetërore dhe pas vlerësimit të të gjitha testeve, duke marrë në konsideratë vështirësitë e këtij viti shkollor, me vendim unanim të Komitetit të Maturës Shtetërore, kemi vendosur uljen e kufirit minimal të kalueshmërisë dhe atë të pikëve për çdo notë”, shkruan znj. Kushi.

Ministrja Evis Kushi thotë se 1820 maturantë janë vlerësuar me notë maksimale në provimin e matematikës, ndërsa ka edhe prej atyre, të cilët nuk kanë arritur të marrin pikët e nevojshme për notë kaluese.

Maturantët zhvilluan protesta në disa qytete të vendit, ndërsa pretendonin se pyetjet e testit të matematikës nuk kishin lidhje me lëndën, që kanë zhvilluar në shkollë. Përgjigjet e provimit të matematikës i gjeni duke klikuar këtu.

LEXONI GJITHASHTU: 

• Maturantët në protestë: Provimi i matematikës i vështirë dhe jashtë programit