FIFA nis hetim për pretendimet për abuzim racist ndaj IShowSpeed gjatë Botërorit

FIFA ka nisur një hetim pas pretendimeve për abuzim racist ndaj influencuesit amerikan të rrjeteve sociale, IShowSpeed, gjatë ndeshjes Argjentinë–Kepi i Gjelbër në Kupën e Botës.

Institucioni i futbollit botëror bëri të ditur se është njoftuar për një incident të dyshuar që ka ndodhur më 3 korrik në stadiumin “Hard Rock” në Miami, ku u zhvillua ndeshja e fazës së 1/16-ës së finales, e fituar nga Argjentina 3-2 ndaj Kepit të Gjelbër.

IShowSpeed, emri i vërtetë i të cilit është Darren Jason Watkins Jr., është një nga figurat më të ndjekura në platformat sociale. 21-vjeçari numëron rreth 57 milionë abonentë në YouTube dhe 53 milionë ndjekës në TikTok. Ai ka transmetuar drejtpërdrejt disa ndeshje të këtij Botërori, ndërsa në transmetimet e tij janë shfaqur edhe presidenti i FIFA-s, Gianni Infantino, si dhe ish-sulmuesi i Barcelonës dhe Milanit, Zlatan Ibrahimoviq.

Në pamjet e publikuara në kanalin e tij në YouTube, influencuesi amerikan shfaqet i veshur me fanellën e Kepit të Gjelbër, teksa përfshihet në një përplasje verbale me një tifoz të Argjentinës në tribunë.

FIFA deklaroi se nuk toleron asnjë formë diskriminimi dhe se kushdo që cenon vlerat e respektit dhe diversitetit nuk është i mirëpritur në futboll.

“Kupa e Botës FIFA është një festë e unitetit, diversitetit dhe respektit. Ajo bashkon njerëz, kultura dhe komunitete nga e gjithë bota dhe kushdo që vepron në një mënyrë që minon këto vlera nuk është i mirëpritur në lojën tonë”, thuhet në deklaratën e FIFA-s.

Ky rast vjen pak ditë pasi sulmuesi i Francës, Kylian Mbappe, reagoi ndaj deklaratave të një senatoreje nga Paraguai, Celeste Amarilla, të cilat ai i cilësoi si raciste dhe të papërshtatshme.

Senatorja e Partisë Liberale Radikale të Paraguait publikoi komentet e saj në rrjetin social X pas humbjes së Paraguait ndaj Francës në fazën e 1/16-ës së finales së Kupës së Botës.

Federata Franceze e Futbollit ka njoftuar se do të paraqesë kallëzim penal ndaj Amarillas, duke i cilësuar deklaratat e saj si të papranueshme.