Turizmi në Vlorë, gazetari: Protestat nuk ndikuan te pushuesit, Sazani dhe Karaburuni vijojnë me fluks

Gazetari Algert Harizaj foli në një lidhje të drejtpërdrejtë nga Vlora për “Now me Erla Mëhillin” në lidhje me sezonin turistik, ndërsa theksoi se protestat nuk kanë ndikuar në fluksin e pushuesve.

Sipas tij, bazuar në atë që shihet çdo ditë në terren, turistët nuk e kanë pasur protestën si faktor që ndikon në zgjedhjen e destinacionit, ndërsa u shpreh se ngjarjet e fundit i kanë dhënë më shumë vëmendje zonës së Sazanit, Karaburunit dhe Zvërnecit.

“Me çfarë unë shikoj në terren çdo ditë, qytetarët nuk e kanë pasur indikator pjesën e ndikimit nga protesta, por me çfarë shihet protesta i ka dhënë më shumë famë qytetit të Vlorës dhe plazhit të Zvërnecit, Karaburunit dhe Sazanit. Kush vjen në Vlorë, një ditë e ka të përcaktuar që shkon në Sazan, Karaburun dhe Porto Novo”, tha Harizaj.

Ai shtoi se këto destinacione vijojnë të regjistrojnë një numër të lartë vizitorësh çdo ditë.

“Nga informacionet që kam unë dhe nga informacionet nga Kapiteneria e Vlorës, rreth 1000 persona shkojnë çdo ditë në këto destinacione. Më shumë kërkesa ka për ishullin e Sazanit dhe Karaburunit. Ka qindra gomone, skafe dhe mjete turistike që çdo ditë bëjnë rrugë drejt Sazanit dhe Karaburunit”, u shpreh gazetari.