RMV mban zgjedhje lokale më 17 tetor me identifikim elektronik

Zgjedhjet lokale në Maqedoninë e Veriut do të mbahen më 17 tetor. Datën e ka shpallur, kryetari i Kuvendit, Talat Xhaferri, i cili bëri të ditur se gjatë 20 ditëve të fushatës zgjedhore nuk do të ketë seanca parlamentare dhe as mbledhje të komisioneve për të shmangur politizimin e aktivitetit parlamentar.

Zgjedhjet lokale duhej të mbaheshin në shtator, por u shtynë me një muaj për shkak se në shtator duhet të mbahet regjistrimi i popullsisë, i cili po ashtu është shtyrë për në vjeshtë për shkak të përkeqësimit të gjendjes epidemiologjike me COVID-19 në prill, kur ishte parashikuar të realizohej regjistrimi i popullsisë.

Vendimi për shpalljen e zgjedhjeve i është dorëzuar Komisionit Shtetëror Zgjedhor, si dhe Ministrisë së Punëve të Jashtme dhe Ministrisë së Drejtësisë, që do të merren me organizimin dhe mbarëvajtjen e procesit zgjedhor.

Megjithatë, mbetet ende e paqarte nëse zgjedhjet do të zhvillohen sipas Kodit aktual Zgjedhor apo do të miratohen ndryshimet që parashikojnë prag zgjedhor për kandidatët e pavarur dhe lista të hapura për zgjedhjen e këshilltarëve komunalë.

Pir kandidatët e pavarur nevojiten 2 për qind të firmave të votuesve, gjë që ka nxitur reagime të shumta, përfshirë edhe nga presidenti i shtetit, Stevo Pendarovski, i cili nuk ka dekretuar ligjin, duke kërkuar uljen e numrit të nënshkrimeve.

Në zgjedhjet lokale të 17 tetorit për herë të parë do të aplikohet identifikimi elektronik i votuesve.