Shtetasit nga Bangladeshi ngatërrojnë vendstrehimin, iu drejtuan Qytetit Studenti

Disa shtetas nga Bangladeshi janë parë të shtunën te Qyteti Studenti ndërsa kërkonin të strehoheshin, konfirmojnë burime për Euronews Albania.

Pranë tyre është gjendur menjëherë policia dhe i ka shoqëruar drejt Zyrës së Emigracionit.

Burime zyrtare nga Policia e Shtetit thanë për Euronews Albania se e gjithë situata ishte si pasojë e një ngatërrese. Sipas tyre shtetasit nga Bangladeshi janë me kontrata të rregullta pune për llogari të një kompanie private, por janë orientuar keq për vendmbërritjen.

Pasi ka shkuar policia, situata është sqaruar dhe shtetasit janë strehuar nga kompania private sipas kontratës së punës.

Ndërkohë Bashkia Tiranë ka bërë përgatitjet për të kthyer 7 godina me 1200 shtretër në Qytetin Studenti në ambiente të përshtatshme për të pritur qytetarët afganë.

Autoritetet lokale në Berat kanë nisur gjithashtu përgatitjet për pritjen e rreth 200 afganëve.

Qëndrimi i tyre në Shqipëri do të jetë i përkohshëm, deri në pajisjen e tyre me vizë amerikane.

Qytetarë të shumtë afganë e të huaj iu drejtuan pikave kufitare për t’u larguar nga vendi, pasi talebanët pushtuan vendin rreth një javë më parë.

LEXONI GJITHASHTU: 

• BE ashpëron masat kundër emigracionit të paligjshëm
• “Punëtorë nga Bangladeshi”, Plarent Ndreca: Tregu i punës është mbushur me mastera shkencorë
• Kakavijë, ndihmoi 7 emigrantë të paligjshëm të kalonin kufirin, arrestohet 21-vjeçari nga Bangladeshi