Adriatik Lapaj: “Shqipëria Bëhet” mbështet Florjan Binajn për Bashkinë e Tiranës

Adriatik Lapaj ka njoftuar përmes një statusi në rrjete sociale se Kryesia e Lëvizjes “Shqipëria Bëhet” ka vendosur të mbështesë kandidatin e pavarur Florjan Binaj në garën për Bashkinë e Tiranës.

Sipas tij, vendimi vjen si pjesë e një qëndrimi të qartë për të përkrahur kandidatë të angazhuar qytetarë dhe jo të dalë nga marrëveshje politike.

“Duke vlerësuar të gjithë ata që kanë shprehur gatishmërinë për t’u përfshirë në këtë garë, kemi marrë vendimin që mbështetja jonë në Tiranë t’i jepet z. Florjan Binaj – një zë i pavarur dhe i angazhuar në jetën publike”, shkruan Lapaj.

Lapaj thekson se kjo mbështetje është në vazhdën e një propozimi të bërë disa ditë më parë nga lëvizja, për të përzgjedhur kandidatë që përfaqësojnë interesin publik në një situatë të jashtëzakonshme politike dhe shoqërore.

“Dy ditë më parë propozuam që, për shkak të situatës së jashtëzakonshme politike dhe shoqërore në vend, kandidatët për bashkitë duhet të vijnë nga radhët e qytetarëve të angazhuar dhe jo nga marrëveshje apo kalkulime të partive politike. Në këtë frymë, deklaruam se do të mbështesnim një kandidat të pavarur që do të shpallte zyrtarisht kandidimin. Ky vendim bazohet në vullnetin tonë të mirë dhe në bindjen e palëkundur se Shqipëria vlen më shumë se çdo parti”, shkruan ai.

LEXONI GJITHASHTU:

• Florjan Binaj shpall kandidaturën për Bashkinë Tiranë: Na duhet një drejtues qytetar
• Florian Binaj tregon pse u bashkua me Lapajn për “Shqipëria bëhet”