Avokati i Popullit ka reaguar në lidhje me aksidentin e rëndë të ndodhur më datë 2 prill në aksin Këlcyrë-Përmet, ku ndërruan jetë 8 persona, mes tyre një 24-vjeçar nga shkodra dhe 7 emigrantë nga vendet e treta.

Përmes një postimi në rrjete sociale Avokati i Popullit kërkon forcimin e masave për të kontrolluar emigrimin e paligjshëm dhe për të promovuar emigrimin përmes rrugëve legale dhe të sigurta.

Avokati i Popullit shton se është e rëndësishme krijimi i mundësive legjitime për emigracion dhe azil, në mënyrë që emigrantët e paligjshëm të trajtohen me respekt.

“Avokati i Popullit ka përcjellë me shqetësim të thellë ngjarjen e rëndë të aksidentit tragjik në aksin rrugor Këlcyrë-Përmet, që solli për pasojë 8 viktima.

Emigrimi i jashtëligjshëm është një sfidë mbarëbotërore dhe çështje e ndjeshme për shoqërinë në tërësi, me të cilën po përballemi fort në dekadën e fundit edhe në vendin tonë.

Ka shumë arsye që njerëzit vendosin të emigrojnë, përfshirë shkëputjen nga konfliktet, kërkesën për mundësi të reja punësimi dhe dëshirën për të përmirësuar cilësinë e jetës së tyre dhe të familjes.

Kjo ngjarje duhet të shërbejë si këmbanë alarmi për forcimin e masave ndaj kontrollit të emigrimin të paligjshëm dhe për të promovuar rrugë legale dhe të sigurta për emigracionin. Adresimi në nivel global i çështjes së migracionit duke trajtuar shkaqet në origjinë, është e vetmja zgjidhje e qëndrueshme.

Forcimi i ligjit dhe zbatimin e tij, krijimi i mundësive legjitime për emigracion dhe azil, si dhe bashkëpunimi ndërkombëtar për të adresuar shkaqet themelore të emigrimit të paligjshëm janë çështjet që duhen adresuar me prioritet.

Është e rëndësishme që politikat dhe ligjet të mbrojnë të drejtat e emigrantëve dhe të sigurojnë që ata të trajtohen me dinjitet dhe respekt. Përsa më sipër, Avokati i Popullit ka hartuar disa raporte dhe ka dhënë rekomandime ku ka adresuar çështje me rëndësi mbi këtë temë.

Kjo ngjarje duhet të na kujtojë për rëndësinë e jetës dhe nevojën për ta ruajtur dhe mbrojtur jetën njerëzore në çdo rrethanë”, thekson Avokati i Popullit.

LEXONI GJITHASHTU:

• “Policia u kërkoi të ndalonin”-Çipa jep detaje nga aksidenti me 8 viktima
• “2 trupa dyshohet se janë në makinën e shkrumbuar”-Kryetari i Bashkisë Këlcyrë
• Aksidenti me 8 viktima në Këlcyrë, Eksperti: Duhet analizuar shpejtësia dhe rruga