Aktivistët e “Nismës Thurje”: Ngjarja e Himarës një vrasje, nuk respektohen VKM-të

Aktivistët e Nismës Thurje kanë protestuar në lidhje me ngjarjen e rëndë të ndodhur mesditën e së martës në Himarë, ku një fëmijë i mitur u përplas për vdekje nga një skaf.

Ata protestuan para Ministrisë së Turizmit dhe një prej aktivistëve, Marsel Rupi u shpreh se ngjarjen në Himarë e konsideron vrasje.

Sipas tij, VKM-të e qeverisë nuk po respektohen dhe shtoi se pushteti është bërë palë me abuzuesit.

“Ne jemi këtu pas një ngjarjeje makabre, ngjarje shumë e rëndë dhe nuk mund të rrinim kurrsesi pa u sensibilizuar. Por pse konkretisht ne jemi në Ministrinë e Turizmit? Sepse ne e konsiderojmë këtë një vrasje, duke u nisur nga kodi penal. Gjatë gjithë kohës ne e kemi thënë qe këta kanë një VKM për plazhet e cila nuk respektohet.

Ka një VKM e cila nuk kemi të respektuar distancën e pushuesve nga deti. Këto janë jo vetëm, pakujdesi dhe bashkëpunime me njerëz të cilët janë të inkriminuar. Pushteti ka qëndruar pale me abuzuesit dhe ja ku jemi sot”, u shpreh Rupi.

Një ngjarje e rëndë ndodhi mesditën e së martës në plazhin e Potamit në Himarë, ku një fëmijë e mitur u përplas për vdekje teksa ishte në breg, nga një skaf i cili drejtohej nga shtetasi Arjan Tase.

Ai mbante detyrën Shef Seksioni i Policimit në Komunitet në Komisariatin e Policisë Elbasan dhe pas kësaj ngjarjeje, është përjashtuar nga Drejtori i Përgjithshëm i Policisë së Shtetit, Gledis Nano.

Dyshohet se Arjan Tase humbi kontrollin e mjetit lundrues dhe përplasi për vdekjen fëmijën në bregun e detit.

LEXONI GJITHASHTU

• Meta: Ngjarja në Himarë e përsëritur, akte nga policë të droguar
• Përplasi për vdekje fëmijën në Himarë, autori efektiv policie
• Skafi godet për vdekje fëmijën 5 vjeç në plazhin e Potamit