Aktori Besnik Çinari tregon rëndësinë që ka ekipi i Vllaznisë për qytetin e Shkodrës

Vllaznia, skuadra përfaqësuese e qytetit të Shkodrës nuk mund të mungonte në serinë e parë të vizitave që “Udhëtarët” do të bëjnë në Shqipëri.

Për shkodranët, Vllaznia nuk është vetëm një skuadër futbolli por një formë jetese. Gëzohen kur fiton, trishtohen kur humbet, e ndjekin në çdo ndeshje kombëtare dhe ndërkombëtare. Kështu që, gazetari Renaldo Salianji nuk mund të mos pyeste disa qytetarë në Shkodër se si ndihen pasi Vllaznia u shpall fituese e Kupës së Shqipërisë.

Astrit Karakaçi, një tifoz i Vllaznisë tregoi për emocionet kur skuadra e tij e zemrës ra nga kategoria.

“Nuk mund ta shpjegoj sa keq e kam përjetuar. Janë emocione shumë të këqija. Nuk di çfarë të them. Na është dukur ai vit sa një jetë,” – tha Karakaçi teksa theksoi se për të fitorja e Vllaznisë këtë vit është një emocion i papërshkrueshëm.

Aktori, Besnik Çinari tregoi gjithashtu se që prej fëmijërisë e ndjek Vllazninë me shumë besnikëri.

“Nuk ka shkodran që se ka qejf futbollin. Vllaznia është emblemë e qytetit tim. Vllaznia është pjesë e zemrave tona,” – u shpreh Çinari.