Alqi Bllako dorëzon në Kuvend mandatin e deputetit, pritet arrestimi

Deputeti i Partisë Socialiste Alqi Bllako ka lënë zyrtarisht mandatin e deputetit. Pak minuta më parë Bllako ka paraqitur në Kuvend dorëheqjen nga mandati.

Një ditë më parë nga vetë Bllako, përmes një statusi në Facebook shprehej se mbledhja e Kuvendit për heqjen e imunitetit të tij ishte i panevojshëm pasi ai do të dorëzonte mandatin dhe do të mbrohej si qytetar i thjeshtë.

Pas kësaj Kuvendi ka lajmëruar anulimin e mbledhjes së Këshillit të Mandateve që pritej në orën 18:00 të mbrëmjes së sotme.

Vendimi i Bllakos pritet t’i hapë rrugën arrestimit të tij siç ka kërkuar SPAK, pa qenë nevoja që Kuvendi të japë miratim.

Për ekzekutimin e arrestimit nga policia, do të pritet që Kuvendi të protokollojë kërkesën e dorëzuar nga Bllako për lënien e mandatit të deputetit.

Deputeti socialist Alqi Bllako dhe ish-ministri i Mjedisit Lefter Koka dyshohet se kanë falsifikuar dokumentin për llojin e tokës ku do të ndërtohej inceneratori i Fierit. Ata ia kanë paraqitur qeverisë sikur ndërtesa e inceneratorit do të bëhej në tokë truall.

SPAK ka provuar se ajo është ndërtuar në tokë arë, vlera e së cilës është më e lirë. Ky falsifikim i ka sjellë buxhetit të shtetit një dëm prej rreth 140 mijë eurosh.

LEXONI GJITHASHTU:

• Manja: Çështja e Alqi Bllakos i takon drejtësisë
• Çfarë do të ndodhë me mandatin e deputetit Alqi Bllako?