Ambasada e Katarit në Tiranë organizon ceremoni me rastin e Ditës Kombëtare

Ambasada e Katarit në Tiranë organizoi një ceremoni pritjeje në mbrëmje me rastin e Ditës Kombëtare të Shtetit të Katarit. Ceremonia u ndoq nga një numër i gjerë zyrtarësh të lartë, përfshirë Ministrin për Europën dhe Punët e Jashtme,Igli Hasani, krerë dhe përfaqësues të Misioneve Diplomatike dhe Organizatave Ndërkombëtare të akredituar në Shqipëri, kryetarë bashkish, si dhe personalitete nga fusha të ndryshme si politika, biznesi, media dhe arti.

Në fjalën e tij, Ambasadori i Shtetit të Katarit në Shqipëri, z. Jabor bin Ali Al Dosari, theksoi rëndësinë e Ditës Kombëtare që festohet çdo 18 dhjetor, duke përkujtuar themeluesin e shtetit modern të Katarit, Sheikh Jassim bin Mohammed bin Thani.

Ai gjithashtu nënvizoi arritjet e jashtëzakonshme të Katarit, që i kanë mundësuar atij të zërë një pozicion të rëndësishëm dhe në rritje në arenën ndërkombëtare dhe rajonale.

Në përfundim, Ambasadori theksoi marrëdhëniet e ngushta dhe të forta të miqësisë mes Katarit, Shqipërisë dhe Kosovës, duke rikonfirmuar angazhimin e ambasadës për të thelluar marrëdhëniet dypalëshe dhe mbështetur çdo nismë që kontribuon në zgjerimin e bashkëpunimit në të gjitha fushat, për të mirën e popujve të të tre vendeve.