Ambasadori i BE-së pas zgjedhjes së Klodian Brahos: Presim me kërsheri bashkëpunimin

Menjëherë pas votimit, ku Klodian Braho u zgjodh kreu i SPAK, i pranishëm në ambientet e KLP foli për gazetarët dhe ambasadori i BE-së, Silvio Gonzato, i cili ndoqi procesin prej shtatë orësh.

Ambasadori Gonzato theksoi rëndësinë e zgjedhjes së Klodian Brahos, duke vlerësuar përvojën dhe profesionalizmin e tij.

Sipas Gonzatos, zgjedhja e Brahos dërgon një mesazh të qartë për përkushtimin e Shqipërisë ndaj luftës kundër korrupsionit dhe krimit të organizuar, duke e bërë SPAK-un një institucion më të fortë dhe të besueshëm.

“Ishim këtu sot për të treguar mbështetjen tonë për KLP-në në detyrën e saj, por gjithashtu dhe për të treguar interesin tonë në procedurën e emërimit. Kjo për arsye se SPAK luan një rol thelbësor në luftën kundër krimit të organizuar dhe korrupsionit, dhe ju e dini se kjo është një nga kërkesat kyçe për anëtarësimin e Shqipërisë në Bashkimin Evropian. Ne theksuam se duhej një krytar i SPAK që do vijonte punën e këtij insitucioni dhe theksuam se kandidati duhet të kishte nivel të lartë pavarësie, integritet dhe standarde të larta”, tha ai.

Ambasadori gjithashtu theksoi se BE pret që bashkëpunimi me kreun e ri të SPAK-ut të vijojë me transparencë dhe profesionalizëm, duke kontribuar në forcimin e sundimit të ligjit në Shqipëri.

“Urojmë zotin Braho për detyrën e tij të re dhe me kërsheri presim bashkëpunim me të në detyrën e re”, tha ambasadori.