Amvisat e Elbasanit ruajnë traditën e ballakumeve, si përgatiten ato

Në Elbasan ka nisur përgatitja e ballakumeve, ëmbëlsirës tradicionale që shënon Ditën e Verës, një festë që përcillet brez pas brezi dhe që për familjet elbasanase përfaqëson më shumë se një recetë.

Ajo është një ritual i trashëgimisë kulturore të qytetit ndërsa për realizimin e kësaj ëmbëlsire përdoret një enë bakri, shpesh shumëvjeçare, që sipas amvisave ndikon në shijen dhe cilësinë e saj. Përgatitja kërkon kohë, durim dhe përzierje të vazhdueshme për disa orë.

“Për ballakumet e Elbasanit na duhet një enë bakri. Marrim gjalpin e shkrirë, por jo shumë të nxehtë, dhe e trazojmë me sheqerin derisa masa të bëhet homogjene. Më pas marrim vezët dhe i hedhim një nga një, duke i trazuar nga dy minuta secilën. Pastaj shtojmë miellin e misrit, të verdhë ose të bardhë, sipas dëshirës”, thotë amvisa Farie Faqolli.

Sipas amvisave, përgatitja ka edhe disa sekrete që e bëjnë ballakumen të butë dhe të shkrifët, përveç recetës bazë.

“Disa i hedhin finjë, disa jo. Por që të bëhen të mira, duhet t’i bësh me dashuri, që të dalin të shijshme, siç dinë t’i bëjnë vetëm zonjat e Elbasanit.”

Një tjetër element i rëndësishëm është ena prej bakri, e cila në shumë familje trashëgohet brez pas brezi.

“Ena duhet të jetë prej bakri dhe shumë e vjetër. Kjo enë është mbi 100 vjeçare. Që të dalin ballakumet e mira, ena është shumë e rëndësishme. Duhet edhe kohë: dy deri në tre orë përzierje pa ndërprerje. Edhe kur nuk je vetëm, duhet të jetë një tjetër që të vazhdojë përzierjen, sepse nuk duhet të ndalet fare që ballakumet të dalin sa më të mira.”

Në prag të Ditës së Verës, aroma e ballakumeve të sapopjekura mbush shtëpitë në Elbasan, duke sjellë jo vetëm shijen e një ëmbëlsire tradicionale, por edhe një pjesë të rëndësishme të identitetit dhe trashëgimisë kulturore të qytetit. Për elbasanasit, ballakumja mbetet simboli më i dashur i kësaj feste, gjithmonë e përgatitur me përkushtim dhe dashuri nga amvisat e qytetit.