Analisti Daci: Greqia përdor minoritetin për pretendime territoriale ndaj Shqipërisë

Analisti Alban Daci e konsideron aspak normale vizitën e kryeministrit grek, Kyriakos Mitsotakis, në jug të Shqipërisë.

Në një intervistë për Euronews Albania, Daci u shpreh se Greqia e ka përdorur minoritetin për pretendime territoriale ndaj vendit tonë.

Sipas tij, shteti grek ka ndërhyrë në disa raste në punët e brendshme të Shqipërisë.

“Ajo vizitë duhet parë në dy këndvështrime. Në këndvështrimin e parë mund të konsiderohej një vizitë normale, nëse do ishte konsultuar si vizitë e një kryeministri të një vendi fqinj, i cili ka të drejtat e tij të takojë minoritarët e atij shteti në territorin e Shqipërisë.

Në këndvështrimin e dytë, kjo vizitë nuk është aspak normale për disa arsye. Greqia dhe Serbia, sidomos vendet e Ballkanit akoma i konsiderojnë çështjet minoritare si çështje për pretendime territoriale. Nuk janë të pakta rastet ku, në mënyrë qoftë edhe jo të drejtpërdrejtë, Greqia ka bërë ndërhyrje te çështjet e brendshme të Shqipërisë, pikërisht edhe në lidhje me çështjet e minoritetit”, theksoi ai.

LEXONI GJITHASHTU

• Mitsotakis në Derviçan: Minoriteti grek, urë bashkëpunimi mes 2 popujve tanë
• Rama- Mitsotakis: Jep fjalën se do vish sërish, unë do jem prapë kryeministër
• Mitsotakis në Derviçan: Do bëjmë të pamundurën të zgjidhim problemet që kemi