Aplikimet për ndihmë financiare, Tatimet kanë shqyrtuar, mbi 17 mijë kërkesa për paketën e dytë

Aplikuesit për ndihmë financiare nga qeveria po shqyrtohen nga Drejtoria e Përgjithshme e Tatimeve e cila nëpërmjet një njoftimi, bëri të ditur se janë verifikuar 17.207 kërkesa dhe pritet disbursimi i shumës për përfituesit e parë.

Drejtoria e Përgjithshme e Tatimeve ka publikuar të dhënat për shpërndarjen e ndihmës financiare nga paketa e dytë ekonomike. Sipas njoftimit bëhet me dije se deri më sot kanë aplikuar 18.082 biznese me një numër total prej 43.551 punonjësish.

Deri më tani Drejtoria e përgjithshme e Tatimeve ka shqyrtuar 17,207 kërkesa me një numër punonjësish prej 37,773 ku pas verifikimit të kryer, pritet edhe shpërndarja e ndihmës ekonomike.

Sipas paketës së dytë ekonomike të qeverisë parashikohen që punonjësit që nuk përfituan nga ndihma e parë e qeverisë, të marrin një shumë prej 40 mijë lekësh e cila do të jetë e vlefshme për një periudhë 40 ditore.

Krahas kësaj, qeveria nga ana e saj ka nisur edhe lehtësimin e masave shtrënguese ku edhe gjallërimi ekonomik pritet të fillojë sërish pasi një periudhe paralize 40 ditore.