Arrestime për incidentin në Novi Sad në Serbi, Vuçiç mbledh Këshillin e Sigurisë

Pas arrestimit të 11 personave, përfshirë një ish-ministër, në lidhje me aksidentin tragjik në stacionin hekurudhor të Novi Sadit, Këshilli i Sigurisë Kombëtare i Serbisë do të mblidhet këtë të shtunë në mesditë për të diskutuar situatën e krijuar dhe zhvillimet e fundit që kanë tronditur vendin.

Mes të arrestuarve ndodhet ish-ministri i Transportit Tomisllav Momiroviç, si dhe zyrtarë të lartë të kompanive private dhe publike të përfshira në projektin e rindërtimit të stacionit hekurudhor, që zgjati tre vjet dhe përfundoi në nëntor të vitit të kaluar.

Incidenti i ndodhur në vitin 2024 nga rrëzimi i strehës në stacionin e rionstruktuar të Novi Sadit shkaktoi vdekjen e 16 personave dhe plagosjen e dhjetëra të tjerëve. Rasti ka nxitur zemërim dhe protesta në mbarë vendin, me pjesëmarrje të qindra mijëra qytetarëve të cilët kërkojnë ndëshkime për përgjegjësit.

Sipas Zyrës së Prokurorit për Krimin e Organizuar, personat e arrestuar dyshohen për veprime korruptive dhe keqpërdorim të fondeve publike, me një dëm të vlerësuar në 115 milionë dollarë në buxhetin e shtetit.

Po ashtu, ka dyshime se konsorciumi kinez CRIC&CCCC, që po ndërton hekurudhën për trenat e shpejtë në Serbi, ka përfituar në mënyrë të dyshimtë një shumë shtesë prej 18.7 milionë dollarësh. Kontratat me kompaninë kineze janë nënshkruar në bazë të një marrëveshjeje ndërqeveritare mes Serbisë dhe Kinës, pa shpallje tenderi publik.

Presidenti Aleksandar Vuçiç, duke komentuar situatën, u shpreh më 1 gusht se “Serbia nuk ka qenë në një pozitë kaq të vështirë që nga viti 2008”, duke përmendur krizën e emigrantëve, pandeminë, luftën në Ukrainë dhe tensionet me Kosovën si sfida të njëpasnjëshme që kanë goditur vendin.

Protestat kundër qeverisë kanë marrë përmasa të mëdha, me përfaqësues të shoqërisë civile, studentëve dhe opozitës, të cilët e kanë bërë aksidentin simbol të kulturës së pandëshkueshmërisë dhe korrupsionit shtetëror.

Simboli i “dorës së gjakosur” është kthyer në shenjë identifikuese të protestuesve në rrugët e Beogradit dhe qyteteve të tjera.

LEXONI GJITHASHTU: 

• Vuçiç pas dënimit të Dodikut: Serbia është në situatë të vështirë
• Dodik shmang paraburgimin pas paraqitjes vullnetare në Prokurorinë e Bosnjës