Arrestohet në Kosovë një nga autorë e vrasjes së 39-vjeçarit te “Kodra e Diellit”

Është arrestuar në Kosovë, Gjelosh Krasniqi, një nga përsonat i cili dyshohet se ka përkrahur Vladimir Kolën, autorin e vrasjes së ndodhur vitin e kaluar në zonën e “Kodrës së Diellit” në Tiranë, ku u ekzekutua 39-vjeçari Briken Sanaj.

Gjeloshi u arrestua mbrëmjen e të martës nga policia e Pejës.

Lajmi mbi ndalimin e tij u konfirmua dhe nga Shkodran Nikçi, zëdhënës i Prokurorisë Themelore në Pejë.

“Mbrëmë nga puna operative është arritur të arrestohet një person (me urdhër arrest ndërkombëtar) i cili dyshohet se ka qenë i përshirë vitin e kaluar për një vrasje në Shqipëri. Me urdhër të prokurorit, i dyshuari Gj.K., është ndaluar për 48 orë, ndërsa brenda afatit ligjor ndaj tij do parashtrohet edhe kërkesa për caktimin e paraburgimit. Për procedurat e mëtutjeshme rreth këtij rasti ju lutem i drejtoheni Ministrisë së Drejtësisë”, ka thënë Nikçi.

Si ndodhi ngjarja? 

Gjelosh Krasniqi dyshohet se përkrahu autorin e krimit Vladimir Kola, i cili qëlloi me kallashnikov në drejtim të Sanajt rreth orës 23:00 të datës 30 tetor, sapo ky i fundit kishte zbritur nga automjeti i tij në rezidencën e “Kodrës së Diellit”.

Ky i fundit humbi jetën nga plagët e marra, teksa po transportohej për në spitalin e Traumës nga miqtë e tij. Makina e autorëve u gjet disa minuta pas ngjarjes në Qafë Kashar, së bashku me armën e krimit.

Bazuar në provat e siguruara, Gjykata e Shkallës së Parë Tiranë zbardhi ngjarjen dhe caktoi masat e sigurisë “Arrest në burg”, në mungesë, për shtetasit:

Vladimir (Valmir) Kola, 39 vjeç, lindur në Pukë dhe banues në Shëngjin, Lezhë, i dyshuar për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”;

Gjelosh Krasniqi, 49 vjeç, lindur dhe banues në Pejë, i dyshuar për veprën penale “Përkrahja e autorit të krimit”;

Kened Antoni, 25 vjeç, lindur dhe banues në Pejë, i dyshuar për veprën penale “Moskallëzimi i krimit”.

Në cilësinë e provave materiale u gjetën dhe u sekuestruan 4 automjete të përdorura nga autori i dyshuar, para dhe pas ngjarjes, 10 aparate celulare, si dhe pamje filmike që i shërbejnë hetimit.

LEXONI GJITHASHTU:

• Zbardhet vrasja e 39-vjeçarit tek “Kodra e Diellit”, në kërkim autori
• Pamje nga vendi ku vrasësit e Briken Sanajt i vunë flakën makinës