Arrestohet një 29-vjeçar në Vlorë, iu gjet armë pa leje në ambientet e tij

Policia e Vlorës ka arrestuar një 29-vjeçar, pasi iu gjet një armë zjarri, pushkë, në një subjektin që i përkiste atij.

Sipas raportimeve të policisë, në pranga ka rënë shtetasi A. F., 29 vjeç, i cili rezulton se ka pasur më parë konflikt fizik me vëllanë e tij, shtetasin G. F., 37 vjeç.

“Gjatë kontrollit të ushtruar në një ambient në përdorim të shtetasit A. F., 29 vjeç, banues në fshatin Lezhan, shërbimet e Policisë gjetën dhe sekuestruan më cilësinë e provës materiale një armë zjarri tip pushkë.

Nga veprimet hetimore rezultoi se ky shtetas kishte pasur më parë konflikt fizik me vëllanë e tij, shtetasin G. F., 37 vjeç.

Në përfundim të veprimeve procedurale, u bë arrestimi në flagrancë i shtetasit A. F., për veprat penale “Prodhimi dhe mbajtja pa leje e armëve luftarake dhe e municionit” dhe “Dhuna në familje””, thuhet në njoftimin e policisë.

Materialet procedurale iu referuan Prokurorisë pranë Gjykatës së Shkallës së Parë Vlorë, për veprime të mëtejshme.