“As Serbia s’na e kërkon”, qëndrimi për Kosovën i fituesit në Mal të Zi

Milojko Spajiç, lideri i Lëvizjes Evropa Tani, që doli fituese në zgjedhjet e së dielës në Mal të Zi, në shkurt të këtij viti ka shpalosur qëndrimin, rreth pavarësisë së Kosovës në një intervistë për mediat malazeze.

Spajiç, që është pretendent për postin e Kryeministrit, ka theksuar se Kosova është shtet i pavarur dhe se kjo temë është e tejkaluar.

“Nuk jam as i sigurt se Serbia po kërkon nga ne që ta anulojmë vendimin për njohjen e pavarësisë së Kosovës. Mendoj se kjo është një nga temat që është prapa nesh. Ne duhet të shikojmë nga e ardhmja. Duhet të dimë se kemi nevojë për integrim në tregjet e mëdha si Evropa dhe SHBA”, ka thënë Spajiç duke marrë qëndrim rreth debateve të shpeshta në Mal të Zi për tërheqjen e njohjes së Kosovës nga ky shtet.