Auditi në PD për financimet ruse, Bozdo: Hetim deri në fund

Akuzat nga Shtetet e Bashkuara se Partia Demokratike ka marrë financime ruse do të hetohen nga një komision auditi i përbërë nga 5 anëtarë.

Për anëtarin e këtij Komisioni, Eno Bozdo ky audit duhet t’a zbardhë deri në fund këtë çështje për të sqaruar pozicionin e Partisë Demokratike dhe çdo gjetje që do të dalë nga hetimi do të dërgohen në prokurori.

“Komisioni brenda mundësive që ka, duhet t’i shkojë kësaj çështje deri në fund dhe të specifikojë nëse Partia Demokratike ka marrë apo jo financime ruse. Për sqarimin e kësaj çështje ne i detyrohemi publikut, por edhe partnerëve tanë ndërkombëtarë. Nëse janë vepra që parashikohen nga Kodi Penal, ne do të marrim masat tona për të vënë në lëvizje edhe Prokurorinë”, u shpreh Eno Bozdo.

Bozdo thotë se PD po përgatitet për protestat, edhe pse në mbledhjen e Këshillit Kombëtar të hënën nuk u vendos për ndonjë datë.

“Prej javësh të gjithë tashmë të gjithë anëtarët e kryesisë, deputetët dhe anëtarët e Këshillit Kombëtar janë terren duke marrë kontakt, jo thjesht me strukturat për riorganizimin, por edhe me grupet e interesit për të realizuar këtë objektiv politik. Besoj që për këtë çështje, shumë shpejt do të ketë edhe veprime konkrete”, tha Bozdo.

Ditën e shtunë Këshilli Kombëtar i Partisë Demokratike do të mblidhet sërish për të votuar rregulloren e primareve, por edhe për të diskutuar për protestat.

LEXONI GJITHASHTU:

• Trafik kokaine, kush është Altin Gega që autoritetet i sekuestruan pasuritë
• Ndryshon ligji i pronave, 7000 dosje do vlerësohen për 3 vjet
• Në 2020, Shqipëria e fundit në rajon për vlerën e pronave të bllokuara