“Autori erdhi në restorant, viktima i shkoi në tavolinë”- Si ndodhi krimi në Ndroq

Gazetarja e Euronews Albania, Sara Demushi ka zbuluar detaje nga vrasja e ndodhur në një lokal në zonën e Ndroqit, ku u ekzekutua me armë zjarri shtetasi Alfred Dedja.

E ftuar në emisionin Review, ajo tha se viktima po drekonte në lokalin ku më pas erdhi dhe autori Julian Gjoshi dhe u ul në një tavolinë tjetër. Sipas saj Dedja i shkoi në tavolinë Gjoshit dhe filluan të debatonin, për disa sekonda dhe më pas ndodhi vrasja. Viktima dhe autori njiheshin me njëri tjetrin dhe kishin patur debate të mëparshme.

“Do nisem nga dinamika ku ditën e sotme në ambiente e lokalit ka qenë duke drekuar viktima me persona të tjerë. Më pas ka mbërritur në ambiente e lokalit autori i cili është ulur në një tjetër tavolinë. Viktima, Alfred Dedja është ngritur nga tavolina dhe ka shkuar pranë tavolinës ku qëndronte Julian Gjoshi që është autori i dyshuar i vrasjes”, tha Demushi.

Gazetarja shpjegon se kanë pasur një debat i cili ka zgjatur vetëm pak momente, ku më pas ka qenë Julian Gjoshi ai i cili ka qëlluar për vdekje Alfred Dedjan.

“Menjëherë janë njoftuar shërbimet e urgjencës, pasi personat që ndodheshin ne vendngjarje kishin shpres se Dedja ishte gjallë, por fatkeqësisht ka ndërruar jetë në momentin që është qëlluar me armë. Deri në këto momente dyshohet se janë dy plumba por janë duke u kryer të gjitha veprimet nga ana e grupit hetimor i cili vijon të jetë ende në vendngjarje në mënyrë që të bëhet dhe dokumentimi i kësaj ngjarje”, shtoi gazetarja Demushi.

Ndër të tjera ajo tha se autori dhe viktima njiheshin me njëri tjetrin dhe kanë pasur një konflikt disa kohë më parë, motive të cilat ende nuk janë të qarta.