Bardhi: Ligji i Investimeve Strategjike në interes të një grushti oligarkësh

Kreu i Grupit Parlamentar të Partisë Demokratike, Gazment Bardhi, është shprehur se Ligji i Investimeve Strategjike është në interes të një grushti oligarkësh dhe kriminelësh.

Komentet Bardhi i bëri pas përfundimit të seancës plenare, në një deklaratë për mediat, ku tha se opozita është e interesuar për normalizimin e punimeve në Kuvend.

Ai tha gjithashtu se asnjë nga aktet ligjore që kaloi sot në seancë, nuk mund të konsiderohet i miratuar ligjërisht, pasi nuk ishte plotësuar kuorumi i nevojshëm.

“Ligji i Investimeve strategjike është në interes të një grushti opigarkësh dhe një grushti personash anëtarë të krimit të organizuar, që kanë marrë statusin si investitor strategjik. Sot në drejtimin e seancës nuk ishte Ermonela Felaj, por përfaqësuesja e 5 oligarkëve dhe 3 grupeve kriminale që përfitojnë nga ligji i investimeve strategjike.

Për opozitën është e rëndësishme që Parlamenti t’i kthehet normalitetit dhe kushtetutshmërisë. Sot asnjë nga aktet ligjore që kaloi në seancë pa u shpallur rezultati i votimit, nuk mund të konsiderohet i miratuar ligjërisht.

Neni 55 thuhet se për efekt të kuorumit llogariten vetëm deputetët që kanë marrë pjesë në procesin e votimit. Në votim morën pjesë 68 deputetë. Që të hapet procesi i votimit për projektligjet, Kushtetuta e thotë qartë që duhet të jenë 71 deputetë. Kur bëjnë këto, imagjinoni çfarë u bëjnë parave publike në fshehtësi.

Ne po presim që të shprehet Presidenti për ligjin për Zonat e Mbrojtura, që është në kundërshtim me Kushtetutën. Prej muajsh grupi Parlamentar është i bashkuar dhe vijojmë punën për ta bërë partinë fituese”, tha Bardhi.

LEXONI GJITHASHTU:

• Tabaku: Ligji që u kalua parashikon investime strategjike në zonat e mbrojtura
• Investimet strategjike në zonat e mbrojtura, reagon Tabaku: Do bëjnë parcela betoni