Basha: Pazar i ndyrë me amnistinë penale! Do përfitojnë drejtorë e zyrtarë

Kryetari i Partisë Demokratike Lulzim Basha tha në fjalën e tij në seancën plenare se nga amnistia penale do përfitojnë drejtorë e zyrtarë të korruptuar por jo shoqëria civile.

Ai tha se kjo amnisti po bëhet për interesa të qeverisë dhe të atyre që kanë “pazare” me qeverinë, e se nga ajo nuk do të përfitojnë protestuesit e opozitës, pasi sipas tij, vepra për të cilën shumica e tyre janë në ndjekje penale nuk përjashtohet nga amnistia.

“Në këtë propozim ka një sërë veprash penale që kanë të bëjnë me korrupsionin e zyrtarëve, të prokurorëve dhe gjyqtarëve, të korrupsioneve në tendera, që nuk përjashtohen nga amnistia penale. Këto vepra penale nuk mund të përfitojnë amnistinë, nuk mund t’u bashkëngjitet halleve të burrave dhe grave që vërtet kanë nevojë për një gjest nga parlamenti.

Gënjeshtra e dytë ka të bëjë me protestuesit. Është fakt i njohur nga Partia Demokratike dhe jo nga përfituesit e tyre në sofrën bujare të qeverisë të ulur këmbëkryq, që shumica e protestuesve ndiqen për kundërshtim të forcave të policisë në bashkëpunim, një vepër penale e cila parashikon dënime mbi 2 vite.

Siç u tha pak më parë këtu, janë jashtë parashikimit të kësaj amnistie. Mbi këto fakte është e qartë se çfarë loje po luhej, është e qartë se çfarë pazari i ndyrë po bëhet. Një palë ka hall t’i njihet etiketa false, pala tjetër ka hallin e numrit gjithmonë e në rritje të zyrtarëve të korruptuar që po bien në burg. Mesazhi që po i çojnë SPAK është “ju i dënoni, ne i lirojmë”. Kjo është e vërteta, këto janë faktet. Falen ata që janë dënuar për aferën e Astirit, por nuk falen nga ndjekja penale protestuesit që mbronin shtëpitë e tyre dhe që ndiqen penalisht për kundërshtim të policisë në bashkëpunim.

Do përfitojnë zyrtarët e Bashkisë Tiranë që shkatërruan banesat në fundin e Bulevardit të Ri, por nuk do të përfitojnë nënat dhe baballarët, që kundërshtuan policinë. E njëjta gjë me banorët e Shkozës, e njëjta gjë ndodh edhe me protestuesit që ishin kundër shembjes të Teatrit Kombëtar”,-tha Basha.

LEXONI GJITHASHTU:

• Me kë e ka? Bardhi: SPAK nuk mbështetet me fjalë por duke dërguar dosje me kallëzime
• Amnistia/ Manja: Përfitojnë protestuesit e opozitës. Pushohen 232 çështje penale